ÖzünÖyrən haqqında

"ÖzünÖyrən" Azərbaycanlı mühəndislər tərəfindən yaradılmış Kütləvi Açıq Onlayn Kurs (MOOC) platformasıdır. ÖzünÖyrən layihəsi vətəndaşlarımıza İnformasiya Texnologiyalarını sərbəst, istədikləri zamanda və dünyanın internet olan istənilən nöqtəsindən fasiləsiz şəkildə öyrənmələrinə imkan yaradır. İstər paytaxtda, istər bölgələrdə, istərsə də dünyanın başqa ölkələrində hər kəs bizim kurslardan yararlana bilər.

Bizim kursların məzmunu real təcrübəyə əsaslanır. İnformasiya Texnologiyaları sahəsi təcrübəni sevən sahə olduğunu nəzərə alaraq bizim kurslarda praktiki tapşırıqlar geniş yer tutur. Biliklər öyrətməkdən başqa həm də bacarıqların formalaşması üçün praktiki tapşırıqlarla zəngindir. Kursları bitirmək üçün yalnız mühazirələri dinləmək deyil həm də real tapşırıqları yerinə yetirməlisiniz. ÖzünÖyrən təcrübi tapşırıqları təqdim etmək üçün ən müasir texnologiyaları istifadə edir.

İnternet dünyasında xarici dildə çoxlu resursların mövcud olmasına baxmayaraq onlardan hər kəs yararlana bilmir. Digər tərəfdən hər bir şəxs üçün informasiyanı öz doğma dilində almaq adətən daha asan olur. Elə bu səbəbdən Azərbaycan dilində təhsil platformasını yaratmışıq. Platformamızdakı bütün məzmun doğma dilimizdədir.

Biz kimik?

Pedaqoji şura

Yaranma tarixçəmiz

Təsisçilərimiz İKT sahəsində təhsillərini 90-cı illərin sonları 2000-ci illərin əvvəlində Bakıda əvvəlcə müstəqil formada başlamış sonra Dr. Ramin Mahmudzadənin rəhbərliyi altında davam etdirmişlər. Bu təhsil yolu müstəqil olaraq başlayıb, sonra isə rəsmi təhsil formasında, daha sonra isə müxtəlif xarici ölkələrdə peşəkar təcrübə formasında davam etmişdir.

• Komandamız İKT və təhsil sahələrində geniş təcrübəsi olan mühəndislərdən ibarətdir.
• Komanda üzvlərimizin hər biri İKT təhsil yolunu müstəqil olaraq başlayıb.
• Hər birimiz müstəqil təhsilimizi əlavə maddi dəstək olmadan və ingilis dilini zəif bildiyimiz bir zamanda, geniş İKT təhsil imkanlarının olmadığı vəziyyətdə başlamışıq.

O zamandan indiyə kimi biz Azərbaycan gənclərinin bizimlə eyni və çox oxşar çətinliklərlə üzləşdiklərini görürük.

• İndi də ingiliscəni səlis bilməyən gənclərimiz çoxdur. Nəticədə onlar İnternet şəbəkəsində mövcud olan pulsuz təhsil imkanlarından yararlana bilmirlər.
• İndi də yüksək keyfiyyətli təhsili ələçatan edəcək maddi imkanlara sahib olmayan gənclər çoxdur.
• İndi də İKT sahəsində müəllim çatışmamazlığı var.

Bu çətinliklərin öhdəsindən gəlməklə Azərbaycan gənclərinə dəstək olmaqda qərarlıyıq!

• Bizi həvəsləndirən gənclərimizin üzləşdiyi çətinliklərin həllini tapmaq istəyidir!
• Bizi güclü edən peşəkar təcrübəmizdir!
• Təhsil sahəsində təcrübəmiz yolumuzu işıqlı edir!

Təklif etdiyimiz dəyər

ÖzünÖyrən İKT sahəsində müstəqil təhsil almaq imkanını təklif edir. Düşünürk ki, bunun üçün:

• Təhsildə zamanlama müstəqil olmalıdır;
• Dərslər real təcrübəyə əsaslanan tapşırıqlarla dəstəklənməlidir;
• Təhsil əlçatan olmalıdır;

Məhz buna görə dəsrlərimizi Sizə hər zaman, hər yerdə, istədiyiniz cədvəl ilə təqdim edirik. Sizə sadəcə İnternet bağlantısı lazımdır.

ÖzünÖyrən həm də müəllimlər və təhsil müəssisələri üçün zəruri olan alətləri, bilik və bacarıqlar təqdim edir.

• Müəssisənizin tələblərinə uyğun əsaslı və effektiv İKT təhsil proqramı və dərsləri hazırlamağı təklif edirik;
• Müəssisəniz üçün aktiv və tam güclə çalışan onlayn təhsil platformasını tərtib edilib hazırlanmasına zəmanət veririk;
• Dərs vəsaitlərinin rəqəmsallaşdırılmasını və yüksək keyfiyyətli onlayn dərslərin hazırlanmasını təmin edirik.

Bizi fərqli edən nədir?

İnternet şəbəkəsində çoxlu təhsil vəsaiti və dərslər mövcud olsa da, çoxu ingilis, çin, və digər geniş yayılmış dillərdədir.

• Bu məşhur dilləri bilməyən milyonlarla insan bu təhsil imkanlarından məhrumdur.
• Həmçinin, adətən ana dilində təhsil almaq çox daha yaxşı nəticələr verir.
• Məhz buna görə bizim platforma azərbaycancadır.

Bir çox hallarda İKT təhsili əlavə kənar proqram təminatı tələb edir.

• Yalnız brauzerdən istifadə etməklə təhsil almaq imkanını yaratmaq üçün davamlı çalışırıq. Misal üçün, brauzer daxilində kod yazmaq imkanı yaradmışıq.

İKT təhsili çoxlu təcrübə tələb edir.

• Buna görə də, dərslərimizin mühim hissəsi praktiki tapşırıqlardan ibarətdir.
• Bütün komanda üzvlərimiz əsaslı peşəkar təcrübəyə malikdir və peşəkar fəaliyyətlərini aktiv şəkildə davam etdirirlər.
• Platformamızın tamı və dərslərimizin məzmunu da komanda üzvlərimiz tərəfindən yaradılıb.

Adətən, İKT təhsili sahəsində çalışan müəllimlər peşəkar təcrübəyə malik deyil. Eyni zamanda, bir çox mühəndisin təhsil təcrübəsi yoxdur.

• Təsisçilərimizin ikisi də bir neçə il ərzində ölkəmizin aparıcı ali məktəblərində Kompüter Elmləri sahəsində dərs deyib.
• Komanda üzvlərimiz ölkəmizin bir neçə ali təhsil ocağı üçün Kompüter Elmləri sahəsində kurrikulumun hazırlanmasında iştirak edib.
• Komandamızın bütün üzvləri həm ölkəmizdə həm də xaricdə təhsil sahəsində könüllü və pulsuz əsaslarla aktiv iştirak edir (misal üçün: seminarlar, dəsrlər, konsultasiya və s.).